تمارين كتابية تقودك إلى بدايات رهيبة!
مرات تمر فترات نفقد فيها لمسة الابداع بالكتابة و ما عندك شيء يلهمك أو تكون في بداية مسيرتك و مو عارف كيف تحسن من مستواك. هنا راح تتعلم كيف تطور من مستواك في كتابة نصوص مشاهد و تخليك تكتب بشككل مستمر و وقتها تقدر تطلع كتابات رهيبة!
راح نبدأ في تمارين شخصية القصة, معرفتك في شخصية قصتك راح تفتح لك أبواب الابداع و تسهل عليك عملية الكتابة بدونها راح تضيع. لما تعرف شخصيتك و مين هي و هدفها راح تتوضح لك قصة حبة حبة.
هنا بعض الأسئلة اللي راح تسأل فيها شخصيات قصتك سواءً الرئيسة أو المجهولة لكن راح نبدأ بالرئيسة و حاول ما تركز على إنه يكون كل شيء مثالي التعديلات بتجي بعدين.
الان تخيل معاي شخصيتك قصتك قدامك و أبدا أسالها:
- لو كان بيتك يحترق وش أول ثلاث أشياء بتأخذها معاك وليه؟
- وش وظيفتك؟
- إذا كنت تقدر وظيفة ثانية وش بتختار و ليه؟
- وش اللي خايف تخسره؟
- وش ذكرى من طفولتك عالقة ببالك؟
- هل في شيء تخفيه عن الكل؟ و ايش هو؟
- وشو شيء تحبه بنفسك و شيء تكرهها فيها؟
هذي الأسئلة ممكن تساعدك في بداية فهمك للشخصية و تلهمك.
والحين تخيل معاي إنك أنت شخصيتك الرئيسية و أدخل عالمها و شوف العالم من منظورها كمل الجمل من منظور شخصيتك الرئيسية:
- أخر فكرة تجي ببالي قبل انام هي....
- أؤمن إنه هدفي في هذا العالم هو...
- الشيء اللي يخليني سعيد هو...
- أعظم إنجازاتي هو...
- الشخص اللي يفهمني مهما صار هو...
الان هذي الأسئلة موجهة لك ككاتب:
- ليه هالقصة بذات؟ وش اللي خلاك تكتب عنها هي بالذات؟
- خايف تكتب عن شيء معين؟ و ليه؟
- وش تبي تعبر عنه من خلال قصتك؟
- ليه هالقصة لازم تصير مسلسل أو فيلم او بس تكون بكتاب أو فيلم قصير..ألخ؟
- وش تحس شخصياتك تحتاج؟
و الحين خن نأخذ شخصيتك لحفلة..
هالتمرين حرفياً ممكن يوديك إلى أي موقف, دام الحين بديت تعرف شخصياتك أكثر خن نحطهم كلهم في غرفة وحده و نشوف يصير..
مين ينسجم مع الثاني؟ و مين ما يطيق الثاني؟ كيف بيتعاملون مع بعض؟؟
ممكن تخلي فيه محادثات و ممكن لا , مو شرط.
وش نوع المناسبة؟ و ليه كلهم تجمعوا؟
جرب التمرين و لا تخطط لنهاية له أو نتيجة من هالحفلة بس أستمتع و شوف كيف الوضع يصير و أيش ممكن تكتشف.
التمارين اللي ذكرناها فوق ممكن تشوفها بسيطه لكن ممكن أيضا تكون سبب في بداية قصة رهيبة. الان علمني ليه أخترت قصتك؟